Home News Kerala News കുസാറ്റിന്റെ സാങ്കേതിക പിന്തുണ: 4 സോളാർ ബോട്ടുകൾക്കൂടി ഓളപ്പരപ്പിലേയ്ക്ക്

കുസാറ്റിന്റെ സാങ്കേതിക പിന്തുണ: 4 സോളാർ ബോട്ടുകൾക്കൂടി ഓളപ്പരപ്പിലേയ്ക്ക്

68

കൊച്ചി: അഞ്ച്‌ വർഷത്തിനുള്ളിൽ ജലഗതാഗത വകുപ്പിന്റെ 50 ശതമാനം ബോട്ടുകളും സോളാറിലേക്ക് മാറ്റാനുള്ള സർക്കാർ പദ്ധതിയുടെ ഭാഗമായി സംസ്ഥാനത്ത്‌ നാല്‌ സോളാർ ബോട്ടുകൂടി നീറ്റിലിറങ്ങും. കുസാറ്റാണ്‌ ബോട്ടുകളുടെ നിർമാണത്തിനായുള്ള സാങ്കേതിക സഹായം ലഭ്യമാക്കുന്നത്. മലിനീകരണം ഇല്ലാത്തതും, സുരക്ഷിതവും ശബ്‌ദരഹിതവുമാണ്‌ സോളാർ ബോട്ടുകൾ. വൈക്കം–തവണക്കടവ്‌ റൂട്ടിൽ അഞ്ച്‌ വർഷമായി സർവീസ്‌ നടത്തുന്ന “ആദിത്യ’ സോളാർ ബോട്ടിന്റെ മാതൃകയിലാണ്‌ ജലഗതാഗത വകുപ്പിനായി സോളാർ ബോട്ടുകൾ ഒരുങ്ങുന്നത്‌. ആദ്യ ബോട്ട്‌ ഒക്‌ടോബർ പകുതിയോടെയും രണ്ടാം ബോട്ട്‌ നവംബറിലും വകുപ്പിന്‌ ലഭിക്കും. മറ്റ്‌ ബോട്ടുകളുടെ നിർമാണം ഡിസംബർ, ജനുവരി മാസങ്ങളിൽ പൂർത്തിയാകും. മാസത്തിൽ ഒരുബോട്ട്‌ വീതം സർവീസിന്‌ എത്തിക്കാനാണ്‌ തീരുമാനം ആദ്യ ബോട്ട്‌ മുഹമ്മ–-മണിയാപറമ്പ്‌ റൂട്ടിൽ നവംബർ ആദ്യം സർവീസ്‌ തുടങ്ങും. ഇന്ത്യൻ രജിസ്‌ട്രാർ ഓഫ്‌ ഷിപ്പിങ്ങിന്റെയും മാരിടൈം ബോർഡിന്റെയും സുരക്ഷാപരിശോധനയ്‌ക്ക്‌ ശേഷമാകും സർവീസ്‌ ആരംഭിക്കുക.

ചേർത്തല പാണാവള്ളിയിലെ യാർഡിൽ കട്ടമരം ശൈലിയിലുള്ള ബോട്ടുകളുടെ ഹൾ നിർമാണം നേരത്തെ പൂർത്തിയായി. സൂപ്പർ സ്‌ട്രക്‌ചർ സ്ഥാപിക്കുന്ന പ്രവൃത്തികൾ അവസാനഘട്ടത്തിലാണ്‌. 1.80 കോടി രൂപയാണ്‌ ഒരു ബോട്ടിന്റെ നിർമാണച്ചെലവ്‌. ഓരോ ബോട്ടിലും 30 സീറ്റ്‌ വീതം ഉണ്ടാകും. രണ്ടാംഘട്ടമായി 75–100 സീറ്റുകളുള്ള ബോട്ട്‌ നിർമിക്കാനും പദ്ധതിയുണ്ട്‌. ആലപ്പുഴയ്‌ക്ക്‌ പുറമേ കൊല്ലം, കോട്ടയം, എറണാകുളം, കണ്ണൂർ ജില്ലകളിൽ സോളാർ ഫെറി പരിഗണിക്കുന്നുണ്ട്‌. സോളാർ ബോട്ടുകൾ പരിഗണിക്കുന്ന റൂട്ടുകളിൽ സാധാരണ ഡീസൽ ബോട്ടുകൾക്ക്‌ പ്രതിമാസം 12,000 രൂപവരെയാണ്‌ ശരാശരി ഇന്ധനച്ചെലവ്‌. സോളാർ ബോട്ടുകൾക്ക്‌ മാസം 350 മുതൽ 500 രൂപ വരെ മാത്രമേ ചെലവാകൂ. അറ്റകുറ്റപ്പണിയും കുറവാണെന്ന മെച്ചവുമുണ്ട്. സൂര്യപ്രകാശം കുറയുന്ന മൺസൂൺ സമയത്താണ്‌ ഇവയ്‌ക്ക്‌ റീച്ചാർജിങ്ങിനായി ചെലവുണ്ടാകുക.

Previous articleഅടുക്കളയിൽ കയറി കടുവ. കടുവാ ഭീതി വിട്ടൊഴിയാത്ത വയനാട് പനവല്ലി പുഴക്കര കോളനി
Next articleസുധാകരൻ ഇടഞ്ഞ് തന്നെ: താനാരോടും ക്രഡിറ്റ് ചോദിച്ചിട്ടില്ലെന്ന് കെ സുധാകരൻ